Skolptūra "Žemaitėjės legėndas"

2008 m. atėdėngta skolptūra „Žemaitėjės legėndas“ šėndėin i̇̄r laikuoma vėino ėš miesta simbuoliu. Ana stuov patiamė Telšiū cėntrė, Katedras aikšties pri̇̄eiguos. Skolptūra, katra kažkėik primėn Ruomas vėlkė, ruoda Žemaitėjės tuotema – meška, Žemaitėjės muotina, katra ont nogaruos neš tris vākus ėr do meškiokus. Kūrėnė autuorē – skulptuorios Kvints Romualds ėr arkitekts pruopesuorios Žebrauskis Algėrds. Pri tuos skolptūras turistams i̇̄r pasakuojamas žemaitiu kilmies legėndas ėr senuovės istuorėjės aple meškas, katruos augėn mėškė palėktus vākus. Čia sožėnuosėt, ka žemaitē savė laika tauto ėr ka ont meškuos nogaruos basiedon vākā ikūnėj žemaitėškā stipri̇̄bē svarbės sritis. Pėrmāsis žemaitiu vāks simbolėzou menininkus ėr kūriejus, katrėi bova ėr i̇̄r Žemaitėjės varuomuoji jiega. Ontrāsis (katros stuov) vāks – pasėšvėntės patrėjuots, karži̇̄gis, gi̇̄nies, katros sauga Žemaitėjės istuorėjė, žemė, popruotius ėr kalba. Tretiuoji figūra (vāks, katros bočioujės so meškioko) – dipluomats, katros sogeb kontrē ėiškuotė sprėndėma ėr rastė išeiti patiuos kebliausiuos situacijuos.

Švelnē delno patri̇̄nė meškuos nuosi, galėt tikietėis gera nuora ėšsėpėldi̇̄ma. Ka tēp i̇̄r ėš tėkra, iruoda tuokiū prisėlėitėmu nublizginta nuosės.

Arkitekta sokorta Žemaitėjės ėr Telšiū istuorėjės pažėnėma par mena kūrinius sistema tor vėina pasėkartuojonti muoti̇̄va – meškas. Gerā paėiškuojos, miestė anū gal sorastė net 47. Na veltou Telšē garsie ėr kāp meškū miests. Īr vėsā mažū meškūtiu, katrėi tvėrtā laika mena kūrinius „Pažink Žemaitėjės suostėnė“ ėr „Žemaitėjės gaubli̇̄s“. Rasėt šarvās apriedi̇̄ta dėdelė meška, katra i̇̄r esėruopštosi i miesta laikruodė buokšta (dailininks – pruopesuorios R. Inčirauskis, meistros – E. Friejos, arkitekts – pruopesuorios A. Žebrauskis). Ana na tik sauga Žemaitėjės laika, bet ėr simbuolėzou žemeitiu omžėna ožsėspi̇̄rėma ėiškuotė geriausiu sprėndėmu ėr anus rastė – patvėrtėnont šūki „Kas būs, kas nabūs, bet žemaitis napražūs!“ Ont Šv. Ontuona Padovietė katedras duru i̇̄r menėšks žemaitiu krėkšta istuorėjės liudėjėms (dailininks – pruop. R. Inčirauskis, arkitekts – pruop. A. Žebrauskis), kor rasėt dar tris istuorėjuos dali̇̄vaujontės meškas.

Ėiškontėms daugiau tū miesta simbuoliu pataram pru iži̇̄miuoji Telšiū amfitijatra nosėlēstė i Mastė ežera pakrontė, kor ont tiltieliu i̇̄r net 6 žaismingas meškelės ...